Quen somos?
50pés consultoras nace da experiencia previa profesional no ámbito da economía de Helena Sanmamede co proxecto de asesoramento Étikas, e da facilitación de grupos, de Mariola Mourelo, como facilitadora independente e en colaboracións, así como do activismo social, económico e feminista de ambas.
Grazas a estas experiencias, detectamos a necesidade de crear un acompañamento integral, que teña en conta tanto os números coma ás persoas, e de base feminista.
Por iso, 50Pés nace en 2021 co obxectivo de axudar a iniciativas empresariais e sociais a desenvolver proxectos grupais efectivos, sustentabeis e rendabeis.
Helena Sanmamede
economista
Formación académica en Ciencias Económicas e Empresariais (Universidade da Coruña). 20 anos de experiencia no ámbito fiscal, contable e xestión de PEMES. Os últimos 10 anos centrada na economía social e feminista e orientada á formación e asesoramento para a autonomía das persoas, profesionais e colectivos nestas materias.
Mariola Mourelo
facilitadora de grupos
Formada en xestión e facilitación de grupos polo IFACE (Instituto de Facilitación e Cambio España), con experiencia na creación de proxectos profesionais e sociais propios e na formación e asesoramento a cooperativas, ONGs, asociacións e en proxectos educativos e para atividades de administracións públicas.
A nosa proposta
Nunha época de recesión económica, na que se deu pulo á cultura do emprendemento, moitas persoas e colectivos lánzanse á aventura de iniciar un proxecto profesional, empresarial, activista ou de vida, sen ter moitos coñecementos, máis aló da súa profesión específica, que hoxe en día son esenciais nun mundo moi complexo, tales como a xestión económica ou de grupos.
Unha abordaxe puramente económica, sen ter en conta as relacións entre as persoas, os seus desexos e necesidades, vai atoparse con continuos bloqueos emocionais que poden resultar, incluso, na fin do proxecto.
Da mesma maneira, un bó equipo de traballo, con obxectivos claros e boa comunicación, se non entende o que implica a xestión económica e administrativa e a planificación fiscal, pode terminar frustrado e sen rumbo por non ser quen de chegar aos resultados marcados.
Co obxectivo de dar resposta a estas necesidades, xuntámonos para ofrecer un servizo completo de asesoramento, acompañamento e formación onde as persoas, os valores e a organización, e os resultados a conseguir, son considerados elementos fundamentais para o bó funcionamento de calquera proxecto grupal.
A perspectiva de xénero e feminista coa que abordamos o noso traballo permite ampliar a visión e acción da nosa clientela e os seus proxectos, así como mellorar os resultados e satisfacción global.
Visión/obxectivo global
Axudar a outras empresas, organizacións, profesionais autónomas a conseguir o éxito nos seus proxectos.
Misión/Soño/Obxectivo
Crear un proxecto profesional, útil, efectivo e pragmático.
Valores
Autonomía, feminismo, acción, non-capitalista, colaboración, transformación, crecemento do grupo